نداء ونصائح لملاك اندلسية للربح من الايجار

 هنتكلم النهاردة عن عدة نقاط مهم لملاك قرية اندلسية للربح من خلال الايجار الموسمي ال بيتم ف خلال فترة الشتاء

خلينا متفقين ان قرية الاندلسية موقعها متميز وفريد نتيجة قربها من البلد بل انها تعتبر اصلا ف البلد يعني لو انت جاي من الكورنيش هتلاقي القريه بعد شاطئ الفيروز وكمان مساكن الشرطه ولو جاي من شارع علم الروم ال هو متميز علي اوله محمصة النصر ال ديما عليها زحمه وطوابير هتلاقي بردو القريه ف الشارع ده...

طيب احنا عاوزين نكسب من الشاليهات بتاعتنا  ف فترة الصيف نعمل ايه ؟؟ هقولك يا سيدي بس انت صحيح معايا وفتح مخك 

اول حاجه انت محتاج لكذا حاجه قبل التسويق او السمسار ال هيمسك الشاليه بتاعك او حتي اعلانك عن النت  

هنكسب اما تلاقي راحة العميل ؟ ايه ده يعني ايه يعني احنا هندور علي راحة العميل مش راحتك انت يعني هندور العميل بيدور علي ايه ف السكن ال جاي يقعد فيه اسبوع او ايام او اي كان ؟؟؟

هقولك يا سيدي بس صبرك عليا... 

اتفضل قول :-

اول حاجه العميل بيدور علي مستوي النظافه يعني حمام نظيف وادمي مياه نضيفه موجوده باستمرار مطبخ اجهزته شغاله ، ثلاجه بتبرد مش قديمه ومهكعه والمطبخ يكون فيه ادات طبخ حلوه مش لازم براندات بس متسيبش ادوات مطبخ جار عليها الزمن وصدت من الركنه. 

كما العميل بيدور علي نومه مريحه ونضيفه يعني مراتب اداميه ومريحه ريحتها حلوه ملايات نضيفه وريحتها حلوه دي كلها منظومه متكامله مش هناجر والسلام عشان ناجر اه هناجر بسعر رخيص بس مش هنعرف نكسب والعميل هيجي ومش هيرجع تاني... 

العميل بيدور علي نظافه ريحه توفير 🤔🤔 وهو انا هوفر للعمبل كمان ؟ اه هتوفر للعميل لو وفرت النظافه والريحه العميل هيجي وهيدفع ال انت عاوزه لانه حاسس انه مقيم ف مكان نضيف وراقي...

طيب قولي علي خطوات :-

هقولك يا سيدي 

هنبدأ بالحمام اولا الحماامات القديم بالقريه اول الاستايل القديم مبقاش ينفع 

محتاج كمان تغير المواسير ال نازل من الخزان وتنضف الخزان قبل بداية الصيف... وتعمل صيانه دورية وشامله للحمام.. عشان كتر الاستهلاك بيخرب وكمان المياه ف القريه مياه تحليه وده بيخلي الادوات الصحيه تخرب بسرعه.. 

خلصنا الحمام ندخل علي المطبخ :- 

المطبخ محتاج الأساسيات يعني بوتجاز سليم ادوات طبخ نضيفه مطبقيه نضيفه مش مصديه حااجات اداميه عشان لو هيطبخ ف المطبخ بتاع سعادتك... 

هندخل بعد كدا علي الغرف اولا الغرف لازم يكون فيها تهويه كويسه مراوح بقي تكييف او اي كان بس تكون شغاله بكفائه 

وهنحتاج سراير سليمه متماسكه مش بترقص ومراتب نضيفه وبعد كل اسره واسره هنشيل الملايات نغسلها ونجيب غيرها نضيف بتدي انطباع محتىر م عن المكان.. 

يا سلام بقي عود بخور بعد كل مالك شوية معطر تبقي كدا عظمه علي عظمه.. 

نطلع علي  الصاله لازم يكون عندنا ف الصاله طربيزة طعام بكراسي محترمه مش مكسره وكمان انتريه مريح ونضيف مش مبقع باكل  والثلاجه لو ف الصاله تكون صوتها هادي ونضيفه وشغاله كويس وبتبرد ويا سلام بقي لو تحط شاشه مش تليفزيون بقاله مئات السنين  يعني الناس اتطورت حد عاوز يجيب بلاي استيشن عاوز يتفرج علي ماتش كوره يعيش يعني... 

انت صح وكلامك ميه ميه!!! اكسب ازاي بقي من الشاليه 

لو قريت ال فوق ده كويس اوي هتكسب كويس جدا من الشاليه بتاعك وهيتاجر بدون ادني تعب منك ومبالغ محترمه.. 

ولو حضرتك محتاج نصايح مني مباشرة عن وضع الشاليه بتاعك ومحتاج ايه تقدر تتواصل معايا من خلال 

01002058823. من خلال برنامج الواتس 

او تتصل بيا علي 01004564574 

ياريت يكون عندنا دم ياجماعه لو هننقل ننسب للمصدر ال تعب وفكر وكتب وطلع بالنتيجه دي انقل براحتك بس انسب للمصدر الله يسترك